"محمود" نعى نفسه قبل وفاته.. صدمة في الأقصر بسبب "رسالة على فيسبوك"

الأقصر - محمد محروس:

تحولت حسابات فيسبوك الخاصة بأهالي محافظة الأقصر إلى دفاتر عزاء لشاب تنبأ بوفاته ونعى نفسه قبل أيام من رحيله عبر صفحته الشخصية على شبكة التواصل الاجتماعي "فيسبوك".

كان الشاب محمود عبده والبالغ من العمر 25 عاماً كتب منشورًا على صفحته الشخصية منذ أيام قال فيه: "الوضع بقى مرعب كل دقيقة والثانية حد يتوفى تعرفه من بعيد أو من قريب كل شوية تلاقي حد منزل خبر وفاة حد عزيز عليه".

وتابع: "بجد بقيت خايف خايف على كل اللي بحبهم وحوليا، فلحظة أفقد حد فيهم الموت مبيفرقش مين صغیر ومین کبیر مين بيبني حياته ومین بيحاول ينجح ومين لا".

أضاف:" خايف دوري أو دور حد قريب مني يبقى اللي جاي، الحياة فعلًا طلعت مش مستاهلة أي حاجة من اللي بنعملها غير إننا نحب بعض ونفضل قريبين من بعض، خافوا على بعض محدش عارف مين ماشي امتى، ممكن تبقى لسه قاعد مع صاحبك وسبته وبعدها بشوية تسمع خبر وفاته، ممكن يختفي يومين تلاتة سواء زعلان أو مشغول تكتشف أنه في الحقيقة مبقاش عايش".

استدرك: "أرجو من أي حد شاف مني موقف وحش أو أي حاجة ضايقته مني يسامحني، وأنا مسامح الكل لأن الدنيا فعلًا طلعت مش مستاهلة إننا نزعل من بعض ونتفرق ليوم واحد لأننا كده كده هنتفرق متستعجلوش".

لقى المنشور تفاعلاً كبيراً على شبكات التواصل الاجتماعي بعد وفاته، فيما خيم الحزن على أصدقائه ومحبيه الذين عبروا عن صدمتهم لوفاته.