الكيلو تجاوز 200 جنيه.. الفسيخ يقفز بأسعار البوري الطازج في البحيرة- صور

البحيرة - أحمد نصرة:

مع تجنب تناول الأطعمة المملحة طوال شهر رمضان لما تسببه من شعور بالعطش للصائم، تحول تناول الفسيخ في أول أيام عيد الفطر إلى طقس معتاد بين السواد الأعظم من أهالي محافظة البحيرة.

ومع حلول العشر الأواخر من رمضان تبدأ الأسر في تجهيز الفسيخ وتمليحه، ويزداد الطلب على أسماك البوري وهو ما تسبب في ارتفاع أسعارها بشكل مطرد ليتجاوز سعر الكيلو منه للأحجام الكبيرة 200 جنيهّا.

يقول أحد تجار أسماك: "بوري الفسيخ كنت ببيعه في نص رمضان بـ 140 جنيه، ووقتها نصحت زبائني إنهم ما يأجلوش الشراء لأن سعره كل ما بنقرب من العيد هيزيد وهو إللي حصل بالظبط، النهاردة سعره عدى الـ 200 جنيه ومش موجود".

ويكمل:"مفيهاش حاجة لو الناس كانت عملت الفسيخ بدري وسألته في الفريزر كام يوم وتطلعه على العيد، بالعكس ده كده أصح عشان التبريد بيقتل البكتريا لو موجودة فيه".

ويوضح سبب زيادة أسعار البوري: "المطلوب أكتر من المعروض وده سببه إن مش أي سمكة تنفع للتمليح لازم يكون حجمها كبيرة عشان متنشفش في الملح، ولازم ميكونش نزل عليها تلج عشان متجلدش، كمان البوري أفضل كتير من الطوبار".

تقول إحدى السيدات تدعى أم منة، من اللاتي يشترين البوري: "جيت أشتري بوري أكسره فسيخ اتفاجئت إن سعره وصل 200، كان لسه من يومين بـ 160، لكن ضغط الناس عليه زود سعره".

وتقول أخرى تدعى الحاجة ابتسام: " سعر البوري رفع خالص وبالشكل ده أي كيلو فسيخ مش هيقل عن 350 جنيه، فالأوفر برضه نشتري بوري ونكسره في البيت".

ويرى مواطن آخر أن الإقبال الزائد على البوري تسبب في ذلك الارتفاع في الأسعار مضيفا: " الناس إللي عملت كده، هو يعني لازم كلنا ناكل فسيخ أول يوم العيد، أنا عن نفسي هستنى لغاية سعر البوري ما يرخص وهكسره".