ميدان التحرير.. ثورة واعتصامات وقريباً ''سوق يوم واحد''
كتبت - نوريهان سيف الدين:
''الجدع جدع والجبان جبان.. واحنا يا جدع رايحين الميدان''.. ''يلا كل حاجة بسبعة و نص''.. مجرد لوحة أمام مجمع التحرير مكتوب عليها ''مشروع سوق اليوم الواحد لتجميع الباعة الجائلين'' أثار علامات استفهام كثيرة؛ بين طريقة لحل مشاكل الباعة وتجميعهم وترخيصهم، وبين الخوف من التكدس المروري في ميدان حيوي يعد ''رمز الثورة الأول''، وبين الخوف من استمرار ''اشتباكات'' الباعة والمارة.
أمام بوابة المجمع تقف ''شيماء'' أمام طاولة عليها بضائع أدوات كهربائية صغيرة وتقول: ''جيت هنا من سنة ونص تقريبا، لكن الباعة موجودين في التحرير أمام المجمع من زمان''، وتكمل جارتها في الرصيف ''أم هدير'': '' احنا عند المجمع من 15 سنة، بس كنا ناحية موقف الأتوبيس وفي حالنا، بنبدأ شغل مع الموظفين ونخلص معاهم، كنا بنلاقي ''الويل'' من أمناء الشرطة ''إتاوة وبلطجة''، دا غير أخد البضاعة من غير فلوس وتكسير الفرش '' .
مشكلة الباعة الجائلة ''هم'' يؤرق كل من المسئولين والمارة، بل تؤرق ''الباعة'' أنفسهم في إيجاد حل يكفل لهم كسب ''لقمة عيش حلال'' وعدم النظر إليهم كأنهم ''بلطجية ومتسولون'' .
''أحمد'' يستند على حائط المجمع ويقف ليحضر أكواب الشاي للعاملين، يقول وهو منهمك في عمله: ''أنا واقف هنا من زمان ودي لقمة عيشي، أيام الثورة كنت بسعف الشباب في ''عيادة كنتاكي''، وشوفت بعيني إزاي ناس ''بلطجت'' ودخلت الميدان تبيع وتشتري وواخدة المسألة ''سبوبة''، ما بالك لو دخلت علينا بياعين لا نعرف أصلهم من فصلهم وكل واحد فيهم يجيب صحابة ''مش هيبأه ميدان .. دا هيتحول لمولد'' ! .
على مدخل سلم المترو، وجدت سيدة مع ابنتها تنظر بحسرة لميدان التحرير وتقول: ''ميدان التحرير كان أحلى من ميادين أوروبا.. تخيلوا ميدان كل ركن فيه بيحكي جمال وعظمة القاهرة.. إزاي نحل مشكلة البياعين دي ''كارثة''؟! '' .
مجموعة شباب قادمة من ''محمد محمود'' تبين أنهم ضمن جماعات الألتراس يقولون: ''نفسنا يرجع ميدان التحرير زي زمان.. ننزل نغني للثورة والعالم كله يشوفنا.. بدل ما يشوف ثوار يلاقي بياعين و ''سبعة ونص وتعالى بص'' ! .
بوادر حل المشكلة اقترحها ''عم سيد'' - أحد المارة - قائلاً:'' أما البياعين فالأفضل لهم ''سوق زي سوق العبور'' على مداخل البلد.. مجمع التحرير فيه مصالح للجمهور من الإسكندرية لأسوان دا غير إقامة الأجانب.. يعني ''المجمع'' منظر للقاهرة كلها.. التحرير كله لازم يرجع زي زمان !'' .
فيديو قد يعجبك:
