"الامتحان جالنا مع بتاع الشاي".. مصطفى يونس يكشف سر نجاحه وفاروق جعفر في الثانوية

كتب- محمد جمعة:

كشف الكابتن مصطفى يونس، لاعب منتخب مصر والنادي الأهلي السابق، عن سبب نجاحه في الثانوية العامة خلال لعبه في النادي الأهلي.

وأضاف يونس، خلال حواره مع برنامج "شيخ الحارة" المُذاع عبر فضائية "القاهرة والناس"، مساء اليوم الثلاثاء: "كنا في الثانوية الرياضية أنا والخطيب وفاروق جعفر وعدد كبير من لاعبي منتخبات مصر، وكنا مش ملتزمين أوي.. وفاروق كان سقط سنتين في الثانوية العامة، وأنا في السنة دي قدمت اعتذارًا، لكن فوجئت إن فاروق راح سحب الاعتذار، فقلت له أنا هفيدك بإيه إحنا مش بنقعد جنب بعض في اللجنة".

وتابع لاعب منتخب مصر والنادي الأهلي السابق: "دخلت لجنة الامتحان وفوجئت أنا وفاروق قاعدين على حجر بعض، وربنا كرمنا آخر كرم، وجالنا إجابة الامتحان من بره مع بتاع الشاي".

واستطرد يونس: "في امتحان الفرنساوي ما كناش نعرف الألف من كوز الدرة، والمراقب جه قعد بينا إحنا الاثنين، فقلت له إنت أهلاوي ولا زملكاوي، قال لي لا كده ولا كده، فقُلت له إنت منين؟ إنت ماتعرفش فاروق جعفر؟ فراح باصص لنا وعرفنا وقال لنا حقكوا عليَّ، وبعت لنا بتاع الشاي بالإجابة".