"شغلنا ما بيعرفش الرحمة".. آيتن عامر تكشف سبب تركها ابنتها مريضة "بتفرفَر"

بكت الفنانة آيتن عامر، خلال إجابتها عن سؤال "شيخ الحارة" عن سبب تركها ابنتها مرضية؛ بسبب تصوير أحد الأفلام.

وقالت آيتن، خلال حوارها مع برنامج "شيخ الحارة" المذاع عبر فضائية "القاهرة والناس"، مساء اليوم الأربعاء: "بنتي كانت تعبانة جدًّا، وأُمي كلمتني وقالت لي درجة حرارتها 39 ومش بتنزل، واليوم ده كان عندي تصوير كليب الدعاية لفيلم مهم.. ويوم زي ده فيه إضاءات متحركة وفرش غالٍ وإيجار فيلا وتجمع للممثلين، فيه تكاليف عالية جدًّا وكنت محتارة".

وأضافت الفنانة: "اتصلت بزوجي وكان بيصور وقتها مسلسل (الوصية)، قلت له مش عارفة اتصرف، وهو برضه كان في موقف صعب؛ بسبب إنه مدير التصوير، لكن فعلًا خد سيارته في البريك وقال لهم هروح أشوف البنت فيها إيه".

وتابعت آيتن: "أنا في مكاني كنت (فول ميكاب) ومطلوب مني أضحك عشان شغلي وعشان دي فلوس ناس، وفيه نص مليون جنيه مصاريف على تصوير الكليب هيترموا في الأرض، ومش بعيد يلبّسوني الفلوس دي لو مشيت".

واستطردت الفنانة: "بنتي سخنة جدًّا، وفي البيت بتفرفر، وأُمّي محتاسة بيها، والناس كلها حواليّا بيضحكوا وأنا منهارة، وبجد ما كنتش عارفة أعمل إيه في موقف لا يمكن أحسد عليه، ومن أكثر المواقف اللي أما أفتكرها بتضايق، حاولت أستأذن وما نفعش، قالوا لي لو مشيتي هيبقى اليوم ده كله في الأرض.. لكن في الآخر مشيت بعد ما حسّيت إن مفيش تقدير ولا إنجاز، والناس كلها واقفة بتهرّج وأنا في عالم تاني، فروحت قالبة عليهم وسيباهم وماشية".

وأضافت آيتن: "اللي خلاني اقعدت 3 ساعات إن فيه واحدة صاحبتي اسمها هيام فاضل راحت أخدت بنتي ووالدتي ودّتهم المستشفى"، متابعة: "شغلنا ما بيعرفش الرحمة، وممكن حد يموت وما نعرفش (نفكرش)، احترامًا لحرمة الميت، وشغلانة مالهاش قلب والناس بتفتكر إن شغلتنا سهلة".