أرملة الشهيد المنسي: "ابني مبسوط بالاختيار ومتأكدة أن أحمد فرحان"

كتب- محمد خميس:

قالت منار سليم أرملة الشهيد أحمد المنسي: "كل القائمين على مسلسل الاختيار، قاموا بالتواصل معنا والمؤلف قضى يومًا معنا في المنزل برفقة عدد من أصدقاء أحمد المقربين وسأل على تفاصيل مقربة بينا في حياته بالنسبة لنوع الأكل وكنت مركزة على الجوانب البيتية والناس في الشارع، وكان بيعدل أي حاجة في السيناريو لحد قبل ما يسلمه، وكل طاقم العمل كانوا حريصين أنهم يطلعوا أقصى تفاصيل عندهم وأنهم يقربوا من الشخصية عندهم".

وأوضحت "منار" في تقرير لبرنامج "على مسئوليتي" على فضائية "صدى البلد" اليوم السبت: "الممثله اللي قامت بدوري في المسلسل إنسانه جميلة وعايزه تنجح، ومحترفة لأنها سألت عن شخصيتي في البيت وقربت ليا، لدرجة أني قلت انها زي أختي لما شفت الحلقة الأولى من المسلسل بالأمس"، مؤكدة: "حضرت بعض مشاهد تصوير المسلسل وحقيقي ممكن مشهد دقيقتين ياخد مجهود وتعب كبير لأنه في حرفية رهيبة وكل حاجه مهتمين بيها وفي بعض مشاهد تخص البيت وكانوا بيرجعولي في أي وقت بيا عشان يشوفوا أقل تفاصيل".

وأكدت: "كان هدفنا أنا وأصدقاء الشهيد أحمد المنسي، أننا نخلي الفنان أمير كرارة شبه أحمد بالظبط، وأبني كان مبسوط بالمسلسل بعد إذاعته وهو واعي ومبهور وبيقعد يتفرج على المسلسل كل ما يتم إعادة المسلسل"، متابعة: "أحنا بنتفاجئ زي المصريين في كل حلقة لأني مشوفتش المسلسل لما خلص ومتأكدة أن المفاجاة هتبقى حلوة في نهاية المسلسل وبشكر كل القائمين على العمل واحد واحد".

واردفت، أرملة الشهيد أحمد المنسي: "متأكدة أن أحمد شايفنا دلوقتي وفرحان جدًا، وبقوله أطمن على مصر اللي أنت ضحيت عشانها، بقوله أطمن على مصر عشان معانا الرئيس السيسي اللي يارب يقويه ويحميه في كل يوم بيعبر بيه ببلدنا لبر الأمان".