خاص| أحمد الرافعي يكشف حقيقة هجومه على مسلسل نيللي كريم "بـ100 وش"

كتبت- ياسمين الشرقاوي:

قال الفنان أحمد الرافعي، إنه لم ينتقد مسلسل "بـ100 وش"، ولكنه ينتقد الأعمال التي تتبنى أفكارًا مماثلة: "أنا بتكلم عن فكرة مبتكلمش عن أشخاص أو عمل بعينه، لأن الفنانين أرقى من أن يتكلموا عن الأشخاص، يتكلموا عن الأفكار".

وأضاف "الرافعي"، في تصريح لـ"مصراوي": "الفكرة بتاعة La casa de papel، Ocean's Eleven، Ocean's Twelve، وأفلام كتير جدًا قد يكون فيه مسلسلات شبيهة لها اتقلدت أو اتسرقت أو اتعملت في مصر أو غير مصر، أنا بتكلم عن فكرة".

وعن مسلسل الاختيار قال: "ابني عمر لما بيشوف منسي (الفنان أمير كرارة)، بيقولي هجيب مسدس وأروح مع عمو منسي، وفي واحد من الشبان دخل على صفحة أحد الأعمال اللي بيتناول فكرة السرقة (بدون ذكر العمل وبدون ذكر اسمه)،
قالهم كل الشباب بتتمنى تروح سينا تحارب التكفيريين وأنا بتمنى أروح معاكوا أسرق البنك!".

وأوضح "الرافعي": "فيه فرق كبير بين عمل وعمل آخر، والصناعة بتاعتنا اللي أنا درستها دراسة أكاديمية، وعارف أبعادها، وعارف بتتعمل إزاي، الفن بيتعمل عشان يعمل حالة التأثير"، "وزارة الثقافة بتاعتنا أول ما نشأت كان اسمها وزارة الثقافة والإرشاد القومي، إنها توجه فالفن بيتعمل عشان يوجه فاحنا لما بنعمل حاجة بنقول للناس ياجماعة شوفوا النموذج ده مختلف كتير عن إننا نفرج الناس على نموذج بلطجي، مجرم، حفنة من حسالة البشر المرتشين والسكارى اللي بيجمتعوا عشان يسرقوا بنك".

واستطرد: "لما بننمذج الجريمة ونخليها نموذج ونخلي الأطفال يتفرجوا عليها بيحصل التأثير السلبي على الناس، فأنا كل اللي قولته في البوست إنه في فرق كبير بين مسلسل يتفرج عليه طفلك ويتوحد مع بطله ويتمنى يبقى بطل يزود عن بلاده، وبين مسلسل آخر طفلك يتوحد مع أبطاله ويتمنى يبقى فرد في عصابة بتسرق بنك"، موضحًا: "البوست بيتكلم عن فكرة عمل مبيتكلمش عن عمل بعينه، يخص حد بعينه أو مسلسل بعينه لأن الفكرة دي موجودة في أعمال كتير".

واختتم حديثه قائلًا: "لما نلاقي مثلا إن في عمل يتم عرضه واليوم اللي العصابة بتنجح فيه بسرقة البنك نلاقي هوجة على السوشيال ميديا والشباب فرحانين، وكلهم كانوا بيتنموا إنهم يبقوا معاهم وكلهم خايفين إنهم يتقبض عليهم لأ يبقى في حاجة تستحق التعليق".

وتداول الجمهور منشورًا للرافعي، يتحدث خلاله عن الأعمال التي تحرض على السرقة، وهو الأمر الذي جعل الجمهور يربط بين كلامه ومسلسل "بـ100 وش"، بطولة النجمة نيللي كريم.

أحمد الرافعي يشارك حاليًا مسلسل الاختيار، إذ يجسد شخصية "عمر رفاعي سرور"، مفتي جماعة أنصار بيت المقدس.