محمد سامي: غادة عبدالرازق أكتر حد ظلمني (فيديو)

كتب- عبد الفتاح العجمي

قال المخرج محمد سامي، إن ضياع حقوقه في الخلافات بسبب انفعاله هو أكبر مشكلة تواجهه، موضحًا: "ده كلام المقربين مني، هم دقيقتين في حياتي بيبقوا فاصل في حاجات كتير، وأنا سريع الغضب بشكل مبالغ فيه، بس براجع نفسي دايما بس ببقى متأخر زيادة عن اللزوم".

وأضاف سامي، في حواره مع الإعلامية بسمة وهبة مقدمة برنامج "العرافة"، الذي يعرض عبر شاشة "المحور": "أكتر شخص ظلمني، فهو الفنانة غادة عبدالرازق، ومع الوقت حسيت إن ربنا سبحانه وتعالى كان كويس معايا".

وتابع: "جاتلي قدام العربية ووقفت وسلمت عليّا وقالت لي اوعى تكون زعلان مني.. عملت معاها شغل كويس وفي عيش وملح واتقال كلام كتير عليّ مش حقيقي، وبعدها ربنا جابلي حقي في حاجات كتير وخلاني أحس بالسعادة".

وأردف: "غادة عبدالرازق مكنتش وحشة طول الوقت، لكن الناتج النهائي إني خرجت بموقف منها، وبعدها ربنا بيكرم حسب اجتهاد كل واحد فينا وأنا ربنا كرمني كتير".

ويعد برنامج "العرافة" امتدادا لبرامج بسمة وهبة الرمضانية والتي تعتمد على كشف أدق تفاصيل النجوم وخباياهم وإظهار الوجه الآخر لهم، مما يؤدي لصدمة كبيرة لدى الضيوف والمشاهدين.