أميرة العايدي لـ"مصراوي": "ببقى مرعوبة وأنا بتفرج على كوفيد 25"

كتب - هاني صابر :

أكدت الفنانة أميرة العايدي، أن مسلسل "كوفيد ٢٥" يعد تجربة مختلفة وصعبة عليها، مشيرة إلى أنها تشعر بحالة من الرعب وهي تشاهد حلقات العمل عقب عرضه على الشاشة.

وقالت العايدي، في تصريحات خاصة لـ"مصراوي": "كوفيد٢٥.. تجربة مختلفة وصعبة جدا، وكلنا كنا مصدقين أوي اللي بنعمله.. الأستاذ أحمد نادر جلال سايب كل ممثل براحته وبيأدي دوره بشكل طبيعي ومش بيتدخل إلا إذا وجدنا نخرج برة الحكاية".

وتابعت "وأنا بتفرج على كوفيد ٢٥ ببقى مرعوبة وكأننا مش إحنا اللي عاملين المسلسل، وكنا في مراحل التصوير بنقول للأستاذ أحمد نادر جلال، الشغل اللي إحنا بنعمله ده هيطلع إزاي.. وفضل يضحك، وقالنا هتتفرجوا عليه وتشوفوا، والحقيقة لقينا حاجة مبهرة وكأن العمل معمول برة مصر سواء تصوير أو إخراج أو كل حاجة فيه".

وأضافت: "كنا متضايقيين في آخر يوم تصوير إننا خلصنا، وكنا مكتئبين أوي، ودي مش بتحصل كتير، واستغرقنا مدة شهرين مع بعض في تصويره، بنتحرك مع بعض في كل مكان، وكلنا كنا عيلة واحدة".

وأعربت عن سعادتها بالعمل مع جميع أبطال المسلسل يوسف الشريف وأحمد صلاح حسني والمؤلفة إنجي علاء، والمخرج أحمد نادر جلال، وآيتن عامر وإدوارد وراندا البحيري وعماد رشاد وكل أسرة العمل.

وأنهت حديثها، قائلة: "وإحنا بنصور كوفيد ٢٥ حاجة، ولما شوفناه لقينا نفسنا حاجة تانية خالص، وبنتفرج عليه وكأننا مكناش إحنا اللي جوه الأحداث".

وتشارك الفنانة أميرة العايدي في دراما رمضان ٢٠٢١ بثلاث مسلسلات هم "كوفيد٢٥"، "ضل راجل"، "بين السما والأرض".

مسلسل "كوفيد 25" بطولة يوسف الشريف، أحمد صلاح حسني، أيتن عامر، إدوارد، إيناس كامل، راندا البحيري، ميدو عادل، أمير صلاح الدين، ميرنا نور الدين، ديانا هشام، إسلام جمال، زكي فطين عبدالوهاب، عماد رشاد، ومن تأليف إنجي علاء وإخراج أحمد نادر جلال.