أحمد صلاح حسني يرد على اتهامه بدخول مجال التمثيل لعلاقة النسب مع أمير كرارة

كتب- مينا غالي:

رد الفنان أحمد صلاح حسني، على ما يتردد بشأن دخوله مجال التمثيل، لعلاقة النسب مع الفنان أمير كرارة، قائلا: أنا ما مثلتش مع أمير كرارة أصلا أول ما بدأت، عملنا 4 مسلسلات مع بعض آه، لكن في حاجات بتتقال بنقعد نضحك عليها دلوقتي، بس أنا عمري ما اتأثرت باللي بيتقال.

وقال خلال لقائه مع الإعلامية أسما إبراهيم، الاثنين، على قناة القاهرة والناس ببرنامج "حبر سري": "مش بتأثر يمكن لأني جاي من مجال صعب وهو كرة القدم، التمثيل ما يجيش جزء من اللي بيتعرض له لاعب الكرة، لأن لو انت رأس حربة وما جيبتش جون في الـ90 دقيقة، هتبقى مقصر قدام الناس وفرقتك خاصة لو بتلعب في نادي كبير".

وتابع حسني: "يمكن حسيت ان بدايتي كنت محظوظ فيها جدا، لأن أول مسلسل عملته كان شربات لوز مع الفنانة يسرا، وبيقولوا أن أول طلعة ليك لازم تبقى محظوظ فيها، لأنها بتبقى فاتحة الخير ومفيش أحلى من يسرا إنك تفتح بيها كاريرك".