هاني البحيري يروي موقفا لا ينساه: استشرت شيخ.. وكنت هتقتل

كتب-وائل توفيق:

كشف مصمم الأزياء هاني البحيري، عن موقف لا ينساه بسبب تصميمه ملابس للمحجبات في بداية مشواره بعد تأديته فريضة الحج.

وحكى أثناء استضافته في برنامج "سابع سما" على شاشة قناة "النهار": "مع أول حجة ليا، استشرت شيخ، جاتلي رعشة، فنزلت للشيخ، قولت له أنا دخلي كذا، وأبويا الله يرحمه توفى، حتى ميراثي عملت بيه كذا، قالي شغلك غلط، وفلوسك حرام، ودخلك حرام، وكل فلوسك حرام، هو قالي كده، مسألتوش ليه، كنت في حالة يرثى لها".

أضاف: "أحرمت ونازل أخلص الحج، وخلاص هناخد الطيارة وهنمشي على مكة، وفي الآخر اداني نصيحة معرفتش أترجمها إزاي؟ قالي اعمل زي بائع السلاح، قولتله إزاي؟ قالي بائع السلاح ممكن يبيع سكينة، فاللي ياخدها ممكن يقتل بيها، أو ياخدها يدبح بيها شاه أو حاجة، قولتله برضه مش فاهم، إيه دخل ده في ده؟ قالي مثلا إديها الفستان أي كان شكله عريان، قصير، طويل، وإديها ما يغطيها، لبسته ما لبستهوش، هي حرة، خلص ذمتك مع ربنا".

وتابع البحيري: "نزلت من الحج، مقتنع، وقولت هفتح محجبات بس، وتعرضت لمشكلة، كنت هتقتل فيها، جاتلي عائلة كلهن محجبات، وجات معاهم مرات أخوهم، قالتلي لو جوزي جه، متقولش إني بعمل عندك فستان، قولت خلاص مفيش مشكلة، كنت صغير وقتها، وأنا بعمل البروفة، لقيت حد داخل، لابس بنطلون قصير، ودقنه طويلة، وقال لو في راجل في البيت هقتله، فأمي دخلت له من الشقة التانية، قالت له أنا اللي بخيط يا حبيبي، وأنا نطيت من البروفة لليفنج روم للمطبخ، وقعدت تحت الترابيزة ساعتين، علشان استخبى، وكأننا بنسرق أو بنعمل حاجة حرام، مع إني كنت جاي وناوي النية لله إني اشتغل بس محجبات، وأرضي العباد ورب العباد، فقولت خلاص هاشتغل عادي والحمد لله رب العالمين، عدت، كده كده هتحاسب".

وأكد على أنه يحاول إرضاء الله في عمله ويرضي غريزته، وأضاف: "أنا مستمر فيه لحد النهاردة عندنا مشاكل كتيرة، وجزء كبير من تمسكي بالشغلاتة لحد انهاردة بحبها".

يذكر أن هاني البحيري، مصمم أزياء مصري، بدأ تصميم الأزياء منذ أكثر من 20 عامًا.