علي الألفي: المطربون الذين لا يغنون مهرجانات يواجهون مقاومة شرسة وأرفض منعها (خاص)

كتبت- منى الموجي:

قال الفنان علي الألفي إنه ودفعته في عالم الغناء، يعانون من نفس الأزمة، وهي أنهم جاءوا بعد انتهاء السوق، على حد تعبيره، مثل من بدأ يبيع الكنافة بعد العيد، لافتًا أن صناعة الأغنية قديما كان بها شركات إنتاج وقنوات، لكنهم جاءوا بعد انسحاب الكل، وأصبح كل منهم متحملا لكافة جوانب الأعمال التي يقدمونها.

وتابع في حوار مع خيمة "مصراوي": "علي الألفي بينتج لوحده، أحمد جمال ونسمة محجوب، وكل المطربين المصريين اللي مش بيغنوا مهرجانات بيواجهوا مقاومة شرسة جدا، الموضوع صعب جدا وإنتاج الأغنية مكلف وتسويق الأغنية بيتكلف عشان توصل للناس، الناس فاكرة إن السوشيال ميديا بتساعدنا بالعكس عملت دوشة وزحمة كتير أوي، والتسويق على السوشيال مكلف جدا، ومش هاكون سعيد إني اشتري مشاهدات مزيفة، وأقول طلعت تريند باركولي مش انتصار من أي نوع، أبرك لي إن عدد قليل سمع الأغنية ويقدرها وحبها عن إني اشتري رقم اتمنظر بيه".

وأضاف الألفي "بنتج لنفسي والظروف مش دايما أحسن ظروف في الدنيا، وعشان كده مش دايما موجود بعمل جديد، ومحتاج إن الإعلام يشوفنا ويدعمنا أحلى من كده، وأن الدولة تبص لصناعة الأغنية الجادة، وكما وقفت في ضهر الدراما، يا رب تقف في ضهر الأغنية، لان هناك دول كتير كانت ورانا في صناعة الأغنية وسبقتنا، فقط المغني المصري اللي بيتصدر هو بتاع المهرجانات وهو صناعته رخيصة ومش مكلفة".

وعلى ذكره لأغاني المهرجانات ورأيه في اللغط المُثار حولها، وما يتردد من مطالبات بمنعها، قال الألفي "أنا ضد منع أي حاجة، لو عندك القدرة والطاقة انك تمنع حاجة بدل ما تمنع اصنع حاجة أحلى بدل ما تحارب حاجة، وتلاقيه صاحبة يمشي يصرخ انه مظلوم ومضطهد والناس تشوفه وتتعاطف معاه اكتر، طب ما تدعم الكويسين، احنا دفعة مهمة جدا مي فاروق وريهام عبدالحكيم وفيه أحمد جمال والشرنوبي ونسمة محجوب وكارمن سليمان ومينا عطا ومحمد رشاد ومحمد شاهين كل دول مش قادرين نقاوم أسامي تانية، لا متمنعش بس ادعمنا احنا واقف في ضهرنا احنا، سهل علينا، لإن عشان نعمل حفلة ده بيحصل بصعوبة جدا".