منتج مسلسل سوتس بالعربي يحتفل بردود الفعل ويكشف تفاصيل التصوير

كتبت- بهيرة فودة:

أعرب المنتج طارق الجنايني عن سعادته بردود فعل الجمهور على مسلسل "سوتس بالعربي"، خاصة بعد عرض الحلقة الرابعة من العمل اليوم الثلاثاء.

وكتب الجنايني منشورًا، عبر حسابه الشخصي بموقع "فيسبوك"، قال فيه: "مع انتهاء الحلقة الرابعة من سوتس بالعربي، الحمدلله في منتهى السعادة بردود الفعل المحبة للمسلسل، والصراحة عندي كام نقطة كدة كنت عايز أوضحهم من أول ما أعلنت عن تصوير سوتس بالعربي، بس كنت خايف تتفهم غلط، بس النهاردة بعد ما الحمدلله المسلسل أثبت نجاحه و الناس بتشييد بيه في العالم العربي كله، أقدر بقى أوضح براحتي".

١-كل صناع سوتس بالعربي من عشاق النسخة الأمريكي، اللي على فكرة تكلفة الحلقة الواحدة منها بأكثر من تكلفة ال٣٠ حلقة عندنا.. وكلنا فاهمين من الأول أنك تعمل adaptation لمسلسل معروف ومحبوب زي سوتس مش هتكون خطوة سهلة خالص و الdie hard fans اللي إحنا أصلاً منهم مش هيتقبلوها بسهولة..

٢- اللي أتفرج على سوتس الأمريكي في العالم العربي ما بين مليون لأثنين مليون بالكتير.. بس العالم العربي حوالي ٣٥٠ مليون، يعني في ٣٤٨ مليون عربي ماتفرجوش على النسخة الأمريكي لسبب أو لأخر و دول الحمدلله معظم اللي اتفرج منهم على النسخة العربي معجبين جداً بكل تفاصيل المسلسل..

٣- علشان إنت شاري فورمات ودافع فلوسه ومعاك حقوقه، فهما كمان عندهم حقوق إنك ما تبوظش شغلهم وتفتي من دماغك، علشان كدة لازم يكون تغييرات السيناريو في أضيق الحدود وبموافقتهم، بما فيها الأسم اللي بيعامل معاملة البراند..

و ده اللي حصل مع الأمريكان نفسهم لما أشتروا حقوق the office مثلاً من أنجلترا وأمثلة تانية كتيرة في التليفزيون والسينما..

٤- الناس اللي بتتعامل على أن هارڤي ومايك ودونا ولويس وچسيكا وراتشيل ولاد خالتهم أو من الرسل اللي حرام يجسدوا على الشاشات العربية، أحب أوضحلهم أن الcreators بتوع سوتس الأمريكي منبهرين باللي إحنا عاملينه وحابين الكاست بتاعنا جدا وشايفين أن ديكورنا وصورتنا أحلى من بتاعتهم و ده عندي في إيميل موثق منهم..

٥- طبيعي أنك تتفرج على الحلقة الأولى وتحس إن المسلسل ده مش ليك فتعبر عن رأيك وده حقك تماماً بس غريبة شوية أن حضرتك لسة بتتفرج لغاية الحلقة الرابعة علشان تكتب بعد كل حلقة أن الأمريكي أحلى برضه، أنا حاسس أنك اتعودت علينا بس خايف تعترف .

٦- الأهم بقى من كل اللي فات ده والسبب الرئيسي لكتابة البوست ده، أن بعد مشاهدتهم لأول ١٠ حلقات، تم الاتفاق مع NBCU أن النسخة العربية من سوتس دلوقتي داخلة الكتالوج الرسمي بتاع NBCU وهتبتدي تتوزع للعالم كله من شهر سبتمبر.

وتابع: "إنت فاهم الفخر اللي إحنا فيه أن لأول مرة مسلسل عربي هيتم توزيعه من شركة زي NBCU؟ أنت فاهم ده قد إيه مهم ومفيد لمصر؟، الخطوة دي بقى بالنسبة ليا أنا شخصياً تكفيني لسنين قدام".

المسلسل مأخوذ عن النسخة الأمريكية والتي تحمل نفس الاسم، وهو من تأليف محمد حفظي، وياسر عبدالمجيد، ومن إخراج مريم أحمدي، وإنتاج طارق الجنايني

المسلسل تدور أحداثه حول شركة محاماة كبرى تضم عددا من الشخصيات الناجحة التي تسعى لتحقيق طموحها في هذا المجال التنافسي، وعلى رأسهم المحامي هارفي سبيكتر الذي يتخذ من الشاب مايك مساعدا له رغم عدم حصوله على شهادة المحاماة المعتمدة، لكنه يتمتع بذكاء وموهبة خارقة في هذا المجال.