"السقا مش بني آدم".. رامز جلال: بعتذر لضحايا برنامجي "رامز نيفر إند" ورمضان كريم

كتب- محمد أبوالمجد:

قدم النجم رامز جلال، اعتذاره لكافة النجوم الذين وقعوا ضحايا لبرنامجه "رامز نيفر إند" والذي يعرض خلال شهر رمضان المقبل، على فضائية "إم بي سي مصر" قائلًا: "عايز مبدئيًا اعتذر لكل أصحابي وأخواتي اللي استضفتهم وعملت المقلب فيهم، بعتذر لأي حد زعل بعد الحلقة ما اتصورت وهيزعل بعد الحلقة ما تتذاع، وحياة ابني بحبهم وبعتذرلهم وهما حبايبي وعلى رأسي".

ورد "رامز" على سؤال الإعلامي شريف عامر، حول النجم الذي كان خائفًا من حلقته، قائلًا: "كل النجوم كنت حامل همهم كلهم، لأن في ناس ردود أفعالهم عنيفة ومش هعمل نفسي بيج رامي وأنا صحتي على قدي، وكان كل اللي هاممني إني مش عايز أدي حد وشي، وبحط وشي في صدر الضيف عشان عندنا حلقات تانية بنصورها".

وعن حلقة النجم أحمد السقا، أوضح "رامز": "السقا بياكل سحالي ومش بني آدم، أنا مفهمتش بيعمل ايه وأنا بصور"، موضحًا: "رئيس قنوات إم بي سي مصر محمد عبدالمتعال واخد مستشفى بيستقبل فيها ضحايا البرنامج، عندنا 3 أو 4 ضحايا بس مجرد فحص لكن مفيش حاجه الحمدلله".

وأوضح: "العربية التي ظهرت في تتر برنامجي مش بتاعتي والنضارات دي شغل عالي وتكلفة وحكايات من إم بي سي مصر وهيئة الترفيه بقى"، موجهًا رسالة لجمهوره، قائلًا: "كل سنة وأنتم طيبين والشعب المصري والسعودي والعربي بخير، ويارب ما يحرمني منهم ابدا يارب، ورمضان كريم على مصر والأمة الإسلامية كلها".