أحمد ثروت يواصل مراحل علاجه: "مفهوم الحمد بالنسبالي اتغير"

القاهرة- مصراوي:

شارك المخرج أحمد ثروت، نجل المطرب الكبير محمد ثروت، صورة له أثناء متابعته لمراحل العلاج في أحد المستشفيات بالخارج.

وعلق ثروت "زمان كنت بقول الحمد لله لما اعمل مشروع جديد أو انجاز في شغلي، ولما ربنا يسترها معايا في أي حاجة، لكن مفهوم الحمد اتغير بالنسبالي لمفهومه الصحيح وعرفت ان الحمد لله مش كلمة بتتقال علي خير جالك او حاجة كان نفسك فيها اتحققت".

وتابع "لأن من كتر ما نعم ربنا حوالينا هو مسخرهالنا بنغفل، وبننسي ان الحمد في نٰفسك انه شغال لوحده وان جسمك مطاوعك في كل حركة بتأمره بيها وانك عارف تدبر حاجتك لنفسك".

واختتم "أي حاجة بعد كدة رفاهية، طبعاً تستاهل الحمد بس لازم نفهم إن ربنا لما بيستر، يرزق أو يحمي أي حد فينا لازم نقول الحمد لله علي الموجود اللي هو مسخرهولك في جسمك أو حياتك".

المخرج أحمد ثروت، عبر صفحته في موقع فيسبوك، كان قد كشف تفاصيل حالته الصحية، وكتب: "في أسبوعين اختلفت الدنيا كثيرا عن ما كنت اراها، واختلف تقييمي للسلع والعملات والنعم، وأن حتى الوقت يمر بحسبة مختلفة.. حسبة أطول وأبطأ، وأدركت ان النفس أغلى عملة.. لا يمكن شراؤها، ويتحول المال فيها إلى ورق ملون، وأن الورد بيدبل. والشوكولاتة بتخلص".

وتابع: "وانك لا تملك من أمرك شيئا اذا لم يحالفك ستر وتوفيق وإذن ربنا، في يوم عادي اتعرض لوعكة صحية، واكتشف بعد أسبوع من الفحوصات بإصابتي بمرض مناعي نادر في الجهاز العصبي (متلازمة الميلر فيشر)، التي تهاجم الجسد، وتمنعك من الحركة التامة".

وأضاف: "ويشاء ربنا انقاذي في الوقت المناسب بفريق طبي على أعلى مستوى من أساتذة وطاقم تمريض داخل وخارج مصر، للسيطرة علي انتشار هذه المتلازمة في الوقت المناسب، وان شاء الله هواصل رحلة التعافي في خلال الايام القادمة، واعتبر هذا الاختبار هو محبة من لربنا لدعوتي لاستشعار كثير من النعم.. دعوة للحمد، دعوة للرضا، وإدراك حكمة ان كل ما هو دون الله دون (من أصبح منكم آمناً في سربه، معافى في جسده، عنده قوت يومه، فكأنما حيزت له الدنيا بأسرها)".

أحمد اختتم: "وأخيراً، كلي طاقة إيجابية ومتقبل وحامد لكل خطوة والقادم افضل، وبحبكم اللي شوفته الاسبوعين اللي فاتو، جه الوقت لما عرفت اكتب اني اشكركم جداً علي مشاعر الحب، اللي من كل الناس اللي زاروني واتصلوا للاطمئنان عليا وبعتولي وماسبونيش لحظة، بشكركم وبوعد ان زي ما اخدت كل حاجة في حياتي جد، جيه الوقت اني لازم اخد صحتي جد وبدعواتكم ان شاء الله ارجع اقف علي رجلي تاني".