عمرو أديب عن الهجوم على الفنانين بسبب الإعلانات: "بشويش على الناس"

كتب- محمد أبوالمجد:

انتقد الإعلامي عمرو أديب، الهجوم على عدد من الفنانين بسبب الإعلانات التي ظهروا فيها خلال شهر رمضان، قائلًا: "قاعدين بنفعص في الناس بسبب الإعلانات، والناس بتقسم وتصنف الإعلانات، لإعلانات شيك وحاجات تانية مش شيك، طب ليه مهي كلها منتجات بتاعت ربنا وفاتحة بيوت".

وقال "أديب" خلال تقديمه لبرنامجه "الحكاية" على فضائية "إم بي سي مصر 2"، مساء الأحد: "إن الفنان يبيع وشه طوال الوقت، في يقولك محمد منير بيعمل إعلان سمنة أو زيت طب ما أحنا مقطعين نفسنا عليهم، ويقولك حسين فهمي بيعمل إعلان بوكسرات هو فيها ايه هو في حد مبيلبسش بوكسرات، سيبوا الناس في حالها لأن دي صناعة وفيها ناس بتشتغل وبتاكل عيش".

وتابع: "ايه اللي فيها وايه يغضب ربنا لما حسين فهمي ولا منير ولا العسيلي ولا الناس دي تعمل إعلان وبعدين دا منتج مصري، بشويش على الناس يا جماعة، ايه فكرة إننا نخلص صيام ونشوف هنقطع في مين النهارده".

وأردف: "الفنانين اللي بيعملوا إعلانات زيهم زي غيرهم عندهم مسؤوليات وأقساط ومدارس، وبيصرفوا على نفسهم كتير عشان يظهروا قدام الناس، ودول قوتنا الناعمة والإعلان مش حاجه تافهة"، مضيفًا: "ايه المانع كهربا يطلع في إعلان الراجل عنده غرامه عايز يدفعها، بس بستغرب لما بتحب انسان وفي ثانية تنساه، إزاي تنسوا منير وحسين فهمي اللي لما كنا صغيرين كان اللي يشوف حسين فهمي تبقى امه داعياله، كل سنة وأنتوا طيبين كونوا عندكم تسامح هو التسامح جراله ايه".

وأردف: "الانتقاد بالشكل دا ممكن يوصل بعض الفنانين إنهم يقعدوا في البيت وانتوا مش بتفيدوا حد والفنان على آخر عمره مش بيعرف يتعالج محدش بيعمله حاجه ومحدش بيفيده، بشويش وكله هيبقى عظيم".