بعد خناقتها مع حسن شاكوش.. تفاصيل أول ظهور لـ شذى

كتب - مصطفى حمزة:

تصدرت المطربة شذى، قوائم تريند مواقع التواصل الإجتماعي، الأيام الماضية عقب هجومها على مؤدي أغاني المهرجانات حسن شاكوش، وسخريته من ملابسه وطريقة حديثه، خلال ظهوره في برنامج "العرافة" مع الإعلامية بسمة وهبة.

شذى، تستعد للمشاركة اليوم الخميس، في إحياء حفل غنائي بمشاركة المطرب محمود العسيلي، في أولى ليالي الخيام الرمضانية، في منطقة مصر الجديدة.

وكتبت شذى، تدوينة عبر صفحتها في موقع فيسبوك، هاجمت فيها حسن شاكوش، قائلة: " طب إنت مستفز يا شكشك بدل كلمة مستفز بتعصبك ودكتورة بسمة وهبه علشان هي ست شيك، قالت لك شذى فنانة زميلة علشان تجبر بخاطرك، بس الحقيقة انت لا فنان ولا زميل بالنسبة لي خالص".

وتابعت: "أنت مؤدي وبالنسبة لي صوتك مزعج، إنما فنان زميل دي انا اعترض عليها بشدة و دي الحقيقة بس علشان دكتورة بسمة مؤدبة وانت ضيفها مقلتلكش الحقيقة".

شذى، أضافت: "وأصلا مينفعش تسأل مين دي، مش علشان لازم تكون عارفني بيني وبينك أريح، لو متعرفنيش وتعمل الشويتين بتوع ااااااه، عارف اسمها ومش عارف أغانيها، ومال شكلها اتغير كده ليه ،و جو ٣ ورقات ده ، لان الرد موجود ، ما انا او محدش فاكرني و لا عرفني مش هيجيبوا كلامي ويعرضوه لك يا جاااااهل".

وعن أغانيه، كتبت: "وأصلا أسماء الأغاني اللي انت قولتها دي بتتكتب على تكاتك متعملش فيها بيتهوفن والنبي، ومش معنى إن فيه هيصه الفترة دي على اللون ده، إن انت واللي زيك صناع المزيكا في مصر، أبدا والله انتوا فاضحنا في العالم كله، برداءة المزيكا اللي بتقدموها".

وأختتمت: "وعموما وعمليا ردك ملهوش دعوة خالص بالسؤال، ولا فهمت منك حاجة ومش عيب انك تحضر قبل الحلقة، عفوي، وعلى طبيعتك دي لما تكون قاعد على مصطبة أو واثق في ردودك الذكية المنطقية، اللي هي مش موجودة أصلا، فإبقى حضر بعد اذنك علشان بدوخ المذيعين معاك، ملحوظة الجاكيت اللي كنت لابسه حريمي يا فنان".

حسن شاكوش، خلال ظهوره في البرنامج، علق على مقطع فيديو، ظهرت به المطربة شذى، وقالت عنه أنه مستفز، ورد مؤدي المهرجانات خلال حلقة برنامج "العرافة"، التي أذيعت الأحد عبر قناة المحور، وقال : "هي بتغني؟ هي دي مغنية!! بتغني إيه؟! معرفهاش والله العظيم.. انتِ حافظة لها أغاني؟!..ربنا يتولاها، أنا مش مستفز زي ما هي بتقول.. أنا بتكلم بطبيعتي لكن أنا مبغلطش ومش بحب أكون fake".

وتابع: "أنا أسمع اسمها لكن معرفلهاش أغاني.. ربنا يتولاها.. هي بتقولي عني مستفز وبلخبط في الكلام.. أنا بطلع أتكلم بطبيعتين ومش بحضر ومش باغلط في حد".