"جاي أبرأ نادية الجندي".. محمد مختار: "حزين إني بطلع مستندات تؤكد دفعي مصاريف بناتي"

كتب- محمد أبوالمجد:

قال المنتج محمد مختار، أن هناك عقد اتفاق بينه وبين الفنانة رانيا يوسف، وينص على أنه لا يخل أي طرف من الأطراف ببنود العقد، والإفصاح عن المشكلات بينهما، قائلًا: "مفكرتش أرفع قضية ومتمناش إني أعمل كده، وأنا معايا أوراق كل المبالغ اللي أدفعت".

وأضاف "مختار" في حواره لبرنامج "حبر سري" والذي تقدمه الإعلامية أسما إبراهيم، على فضائية "القاهرة والناس" اليوم الاثنين: "حزين إني بطلع أوراق ومستندات تقول إني دفعت مصاريف البنات، لأنه ميصحش عشان أي حاجة، وهي اضطرتني كفاية اللي عملته بقى من 4 سنين".

وتابع: "رانيا يوسف كانت بتقول من قبل 4 أو 5 سنين، أن محمد مختار دا مفيش أخوه في مصر ومفيش زيه ولا شبهه، وجدع وواخد باله من بناته ربنا يخليه ومش عارف إيه، ولكنها قلبت شخصية تانية بعد ما اتجوزت تاني".

وأضاف: "ليا ناس محبين عملوا لرانيا يوسف فيديو صغير عن كلامها الإيجابي والسلبي وقالوا عايزين نعرف نصدق ايه فيهم"، متابعًا: "دي آخر مرة هطلع المستندات اللي تقول إني بصرف على بناتي وأنا مش هعمل كده تاني، وأنا جيت عشان أبرأ ذمة نادية الجندي من الكلام اللي اتقال عليها، نادية ملهاش دعوة خالص إحنا في شهر كريم والست دي اتظلمت وحسيت إنها اتظلمت بسببي ومكنتش تستاهل خالص عيب".