"التمثيل عالجني".. ريهام عبد الغفور تكشف أسباب ذهابها لطبيب نفسي

كتب- محمد أبوالمجد:

كشفت الفنانة ريهام عبد الغفور، عن أسباب ذهابها لطبيب نفسي، قائلة: "كنت أعاني من أزمة الثقة بنفسها، والتمثيل عالجني كتير، بجانب معرفتي بجوزي شريف، غيرولي كل الموضوع دا"، مضيفة: "روحت لدكتور نفسي كام مرة كده بسبب أزمة نفسية ومعرفش ليه صدقيني".

وقالت"ريهام" في حوارها لبرنامج "حبر سري" والذي تقدمه الإعلامية اسما إبراهيم، على فضائية "القاهرة والناس" اليوم الثلاثاء: "أنا معرفش ليه وأنا صغيرة كنت قابلة للعقد، وكنت أي كلمة ممكن أكبرها في دماغي، وكنت دراما كوين".

وتابعت: "أنا أول مرة في حياتي كان عندي أزمة واضحة، لما واحد في المدرسة قالي أنا معجب بيكي عشان شكلك أمور، ودخلت أعيط ساعات لأني كنت متأكدة إنه بيتريق عليا، بس اتعالجت بشكل كبير من الموضوع دا".

وأردفت: "بحاول أشجع ولادي وهما صغيرين وأخليهم واثقين من نفسهم وفي نفس الوقت يكونوا متواضعين وبساط، وأنا من صغري كتومة وأسرتي مكنوش يعرفوا بمر بأيه، وجيلنا غير جيل أهالينا وبقى عندنا طرق لحماية نفسنا".

وأكدت: "مامتي من صغري كان فيها جزء أشد من والدي وحاسمة، ولكن ملهاش دعوة بأزمة الثقة لأنها حاجة داخلية من جوايا".