"استحرمت يروح منها".. ريهام عبد الغفور توضح طريقة إقناع رنا رئيس بمسلسل "أزمة منتصف العمر"

كتب- محمد أبوالمجد:

قالت الفنانة ريهام عبدالغفور: "أنا خفت من مسلسل أزمة منتصف العمر في البداية لأن الموضوع غير تقليدي ومش مريح لكل حد ولا ليا كمان، لكن هو موجود والدنيا فيها حاجات أصعب من كده بكتير، وإحنا ناس مش متعودة تواجه مشاكلها ولكن بتستخبى".

وأضافت "ريهام" في حوارها لبرنامج "حبر سري" والذي تقدمه الإعلامية اسما إبراهيم، على فضائية "القاهرة والناس" اليوم الثلاثاء: "إحنا مش مطلعين الشخصيات مثالية أو كويسين ولكن بني آدمين غلطوا غلط كبير أوي ودفعوا الثمن حياتهم كلهم، وأنا مقتنعة جدًا باللي عملته، ودور فيروز من أحب الأدوار لقلبي وبحبه جدًا جدًا"، موضحة: "يبقى بنروح لعلاقات محرمة لو في نهاية المسلسل أنهم اتجوزوا في الآخر وعاشوا حياة سعيدة لكن دول حياتهم اتدمرت".

واردفت: "لو قلبتي على الانستجرام هتلاقي كل دقيقة قصة لا تتخيليها"، موضحة: "قريت على مواقع كتيرة وشوفت حالات كتير شبه الشخصيات في مسلسل أزمة منتصف العمر وشفت على إنستجرام ناس بتتحاكم بسبب حاجات أغرب من خيالنا بكتير، وللأسف الدنيا فيها حاجات وحشة كتير".

وأكدت: "في نهاية المسلسل طلعنا الشخصيات دفعوا حياتهم لأن في غلطات مينفعش نقول عليها اسفين، وفي غلطات تكلفك حياتك وكل دنيتك، وأنا مقتنعة تمامًا بالمسلسل".

وعن إقناعها للفنانة رنا رئيس بالمشاركة في مسلسل أزمة منتصف العمر، بعدما رفضته 3 مرات، قائلة: "شفت رنا في مسلسل موضوع عائلي، وهي بنوتة كتكوتة ولذيذة أوي وشاطرة، فلما كان في أسامي مقترحة، كنت حاسه إن رنا أكتر حد فيهم هقدر أبقى حاسه أحاسيس تجاهها كبنتي".

وأوضحت: "مخوفتش من كونها تبقى بنتي بسبب السن، لأني معنديش مانع أعمل أم لحد أكبر مني لو هعمل ميك أب وأتصدق، وكنت مستخسرة الدور يضيع من رنا، لأنه حلو جدًا وكنت حساه ممكن يبقى خطوة كويسة في مشوارها، وكلمت والدتها لأنها صديقة عمري، وكنت مستحرمة حد غيرها يعمل الدور دا لأنها الأنسب من وجهة نظري".