"لقيت فيه الأمان والاحتواء".. روجينا تكشف أسباب موافقتها على الزواج من أشرف زكي

كتب- محمد أبوالمجد:

علقت الفنانة " روجينا " على سؤالها عن موافقتها على عريس تقدملها في عمر 18 عامًا، قائلة: "دي بتبقى فترة صعبة أوي، لأنك بتكوني صغيرة وبتحسي إن اللي عايزاه لازم تعمليه وتنفذيه في الوقت دا، ومبتبقيش عارفة دا صح ولا غلط، التجربة بعد العمر بتكتشفي فيها كان صح ولا غلط، مضيفة: "كل داب يبقى طيش الشباب ودفعة الرغبة في عمل الحاجة".

وقالت "روجينا" في حوارها لبرنامج "أنا والقناع" والذي تقدمه الإعلامية منى عبدالوهاب، على فضائية "الحياة" اليوم الثلاثاء: "السكينة مش بتكون سرقاكي بقدر ما أنتي بتبقى صغيرة وعاوزة تعملي الحاجة دي وأتجوز الراجل ده ، وبتبقى عايزة تنفذي"، موضحة: "أنا كنت عوزة أتجوز مش عشان أشرف زكي عريس لقطة".

وتابعت: "أشرف زكي كان معيد في المعهد وأنا طالبة بس لقيت فيه البطل والأمان ولقيت فيه حاجات كتير متجددة فيه لحد يومنا هذا وعشان كده كنت عاوزة اتجوزه وأكون معاه".

وأردفت: "أشرف زكي عنده احتواء ولو أنا وهو صحاب لما يبقى عندي مشكلة هكلمه، ولو أزمة هقوله، ولو حد من أهلي عنده مشكلة هروحله، فما بالك لما يبقى جنبك وكمان حب، وهو خلاني أحبه من أول دقيقة".

وأكدت: "أشرف زكي مش اسم لكن صفة، وخلاني أحبه وارتبط بيه جدًا في الفترة دي وأقف قدام الدنيا كلها وأقول أنا عاوزة الراجل دا وعاوزة أعيش معاه".

يذكر أن برنامج "أنا والقناع" هو برنامج رمضاني تقدمه الإعلامية منى عبدالوهاب ويُعرض على قناتي الحياة وcbc ضمن خريطة الشركة المُتحدة للخدمات الإعلامية وإنتاج شركة DS+، ويستضيف عدد من الفنانين، مثل النجمة يسرا والنجمة غادة عادل والنجمة نيللي كريم والنجم شريف منير وشيماء سيف والنجم الكبير محيي إسماعيل وبيومي فؤاد وريهام عبد الغفور.