"أنا لغز كبير".. شيرين رضا ترد على سؤال هل من الممكن أن تعود في يوم من الأيام لعمرو دياب

كتب- محمد أبوالمجد:

أكدت الفنانة شيرين رضا، إنها مقتنعة بعلاقتها بدينا الشربيني وزينة عاشور، قائلة: "زينة هي أم لأخوات بنتي، ودائمًا كنت بقول لبنتي نور إن زينة مش مرات أبوكي هي مامتك الثانية، خاصة لما أنا مبكنش موجودة او هي موجودة عند والدها"، مضيفة: "مبحبش كلمة مرات الأب، فكان لازم نبقى أصحاب لأن في بينا 4 عيال أخوات ملهمش ذنب".

وقالت "شيرين" في حوارها لبرنامج "أنا والقناع" والذي تقدمه الإعلامية منى عبد الوهاب، على فضائية "الحياة"، مساء الأحد: "دينا الشربيني صاحبتي من زمان، وعمري ما كنت هخسر صداقتها ولحد دلوقتي مخسرتهاش ولسه أصدقاء وهنفضل طول العمر"، موضحة: "أنها تصدق صداقة سيدات كانوا يحبوا نفس الرجل، لأن الصداقة صداقة، ولو نزعنا كل ما يضايقنا وقت علاقتي بالرجل من تاريخي وتفكيري هلاقي الحياة ماشية عادي".

وأضافت: "لما ببص لعمرو دياب مش بفتكر أننا كنا متجوزين وإني زعلت منه يوم كذا، نسيت كل دا"، موضحة: "الأنسب لعمرو دياب هو اللي يقدر يحدده، لأن العلاقة بين أي اتنين لازم تيجي من جوا الشخص، ولازم يحصل تفاهم ووجهة نظري أنا ملهاش دعوة بالحقيقة".

ووجهت الإعلامية منى عبد الوهاب، سؤالًا للفنانة شيرين رضا، قائلة: "لسة بتسمعي أغاني عمرو دياب"، لترد، قائلة: "أكيد، وبحب أغنية تملي معاك أوي، لأني أنا وبنتي بنحب الأغنية دي جدًا"، لتقاطعها الإعلامية منى عبد الوهاب: "ولا مرة خطر في دماغ شيكا ليه منرجعش على مدار كل السنين دي"، لترد شيرين، قائلة: "لأ خلاص الحياة بتودي كل حد في سكته وأنسب لنا الصداقة دلوقتي".

وقالت الإعلامية منى عبد الوهاب في حديثها للفنانة شيرين عبد الوهاب: "في حاجات بتتكسر مش بتتصلح ؟ وانتي طبيعتك كمرأة ممكن ترجعي لعلاقة فاتت في حياتك ولا لما بتمشي مبتعرفيش تبصي وراكي؟"، لترد شيرين: "أكيد اللي بيتكسر مش بيتصلح، ومش بعرف أبص ورايا وبمشي للأبد".

وأكدت: "أنا لغز كبير وأنا بس اللي معاه مفتاح اللغز، ومش بخاف من الحب وتعودت أن مشاعري متكنش هي المتحكمة في أفكاري وأرائي، وأنا مش أكتر واحدة فهمت عمرو دياب وإحنا كنا صغيرين وقت زواجنا وأعرفه من صغرنا ونعرف بعض كويس ولكن مش أكتر واحدة أفهمه ومش فاكره غير الحاجات الحلوة اللي بينا ومش بحب افتكر الحاجات الوحشة".

يذكر أن برنامج "أنا والقناع" هو برنامج رمضاني تقدمه الإعلامية منى عبدالوهاب ويُعرض على قناتي الحياة وcbc ضمن خريطة الشركة المُتحدة للخدمات الإعلامية وإنتاج شركة DS+، ويستضيف عدد من الفنانين، مثل النجمة يسرا والنجمة غادة عادل والنجمة نيللي كريم والنجم شريف منير وشيماء سيف والنجم الكبير محيي إسماعيل وبيومي فؤاد وريهام عبد الغفور.