"بيدي لمراته 40 مليون كأنهم 40 قرش".. محمود سعد ينتقد جعفر العمدة: "حاجات غير منطقية"

كتبت- منال الجيوشي:

قال الإعلامي الكبير محمود سعد، إن نجاح مسلسل "جعفر العمدة" لافت للنظر وهذا لا يعني أن باقي المسلسلات لم تحقق نجاح

وأضاف "سعد" في لايف عبر قناته الرسمية بموقع يوتيوب: "إيه سر جعفر العمدة، أنا شايف قدامي شخصية معرفش حاجة عن ابنه غير في الآخر، عايز أعرف هل أداء الممثلين هو اللي عجبكوا".

وتابع: "النهاردة فيه عياط كتير يعمل انهيار عصبي، يعني الناس تقعد تعيط نص ساعة وضغطها يرتفع، أنا فاكر مسلسل يتربى في عزو لما ماما نونا ماتت ويحيى الفخراني عمل مشهد فظيع، إحنا بنحب النكد".

ووجه سعد انتقادات للمسلسل قائلا: "إيه سر النجاح رغم إن أحداث المسلسل تلاقي فيه حاجات مش مفهومة ومش منطقية، والمفروض إن جعفر واحد من السيدة زينب ناصح وقدر يعمل ملايين الجنيهات، وأخوه بيدي 5 مليون لمراته عادي، وجعفر بيدي 40 مليون لمراته كأنهم 40 قرش".

واستكمل: " بس أنا مشفتش رجل أعمال عامل مكتبه دكانة، يعني إيه تعمل مكتبك وتبقى في الشارع وتفتح الباب تلاقي مكتب فخم جدا، والعفش اللي مستخدم في البيت تلاقيه من التمانينات فيه تفاصيل كتيرة جدا، ومش معنى إني في السيدة زينب تبقى السفرة طراز قديم".

ووجه سعد لجمهوره سؤال: "إيه اللي لقيته في جعفر هل إنتي زوجة من الزوجات ولا ضاع عمرك زي نرجس مثلا، مسلسل اتسليتوا منه والمهم تعرفوا إحنا بننبسط من إيه".

وأضاف: "الدور ده إعادة اكتشاف هالة صدقي، بس برضو المسلسل مفيهوش قصص نجاح زي النمر الأسود، العمدة بيدور على ابنه بقاله 19 سنة، لما أخوه اتضرب فين رجالته".

واستكمل: "كل الممثلين عاملين شغل كبير ورمضان له شعبية كبيرة واختيار الشخصيات كان كويس، بس عندي تحفظ على اختيار أحمد فهيم سيد ممسكش الشخصية كويس لأن ابن السيدة زينب ميقعدش يعيط".

وتابع: "ياريت نبص ليه المسلسل نجح عشان نعمل حاجة تسعد الناس وتبسطهم، الفن مش شرط يبقى هادف وبيناقش قضايا كبيرة، وعلى الجانب الآخر فيه منى زكي بتناقش قضية مهمة".

أما عن الغموض في قصة العمل، قال: "لا مفيش غموض لأننا عارفين إن الولد ده ابنه من البداية، ياريت كانوا عملوا ده من البداية وحيرونا".

واستكمل: "حلقة امبارح الكلام اللي قالته نرجس منة فضالي مهم جدا، فكرة إن الراجل عامل جدول لأن نرجس اكتشفت إن عمرها ضاع وده مش انساني إنها في جدول، وهو قال عندها حق وأمه عندها حق، كل ده كلام له معنى وكلام مهم، ومحمد سامي عمل مشهدين لمنة فضالي بشكل كويس وهي عملت التمثيل حلو جدا وبسيط جدا".

وأضاف: "معنديش تحفظات على محمد هو جميل وموهوب ومجتهد ولكن معنديش تقييم على المسلسل مشفتوش برؤية الناقد، شخصيا اتعلمنا نفهم في الأعمال الفنية عندي ملاحظات كتير".