"قعدت أعيط".. تامر حبيب يعلق على الحلقة الأخيرة من مسلسل "الهرشة السابعة"

كتب- هاني صابر:

علق المؤلف تامر حبيب، على أحداث الحلقة الأخيرة من مسلسل "الهرشة السابعة"، الذي عرضت نهايته وآخر حلقاته أمس الخميس، على قناة "إم بي سي مصر".

ونشر تامر حبيب، بوستر مسلسل الهرشة السابعة، عبر حسابه على إنستجرام، وعلق: "امبارح كان عندي واحد صاحبي مكنش شاف الهرشة السابعة، وأنا مش على بعضي، ومتوتر بجد علشان آخر حلقة كانت نزلت وأنا مش قادر أصبر، وعايز أتفرج وهو من كتر ما سمع كلام حلو، كان مستني علشان يشوف المسلسل كله على بعضه، فأقترحت عليه من باب إني أقعد مع الولاد أطول وقت ممكن وأشبع منهم قبل ما يسيبوني، اقترحت عليه إني أفرجه على أول حلقة، وقعدنا نتفرج على الحلقة الأولى أنا وهو واثنين من الاصدقاء الواقعين في غرام المسلسل زيي".

وتابع: "يا نهار أبيض على الاحساس .. الولاد كانوا لسه صغيرين، وخدونا معاهم رحلة مليانة خبرة وتقل وشجن وضحك ودموع وحب ووجع وبهجة وآلم .. حياة في خمستاشر حلقة.. سبع سنين بعبلهم زي ما بيتقال.. ومش آدم ونادين وشريف وسلمى بس، لأ ده هم واللي خلفوهم، اللي هما كمان حلوين قوي وبني آدمين قوي، وبشكل شخصي، واللي كان يعرف أمي كويس أكيد هايتفق معايا، البديعة فيفي أم آدم ما بتفكركوش بالعظيمة ‎زيزي أم تامر؟".

واستكمل: "وبعد ما شفنا أول حلقة، وصاحبي مشي، وقعدنا شفنا آخر حلقة، وقعدت أعيط من نص آخر مشهد لغاية ما التيترات خلصت".

وأضاف: "كأني في صالة المسافرين في المطار بودع ولادي اللي مسافرين لمجهول وأنا بدعيلهم بالسعادة والرضا، وبفكر في رحلة السبع سنين وفي دماغي صوت عبد الحليم بيغني: شوف خدتنا منين يا قلبي وشوف سابتنا فين، بحبكم وكل ما هاتوحشوني هتفرج عليكم تاني وتالت وعاشر يا حلوين يا ولاد الحلوين، الهرشة السابعة".

الحلقة الأخيرة مسلسل الهرشة السابعة

ومن بين مفاجآت الحلقة الأخيرة من مسلسل الهرشة السابعة، يظهر الفنان ماجد الكدواني كضيف شرف، في مشهد واحد.

مشهد ماجد يظهر فيه بشخصيته كضيف واحد من حلقات بودكاست تقدمه نادين- أمينة خليل ضمن أحداث المسلسل، المعروض في رمضان 2023.

ويتحدث ماجد عن: "ليه العلاقات بتبوظ سؤال وجودي فكرت فيه وفي أسئلة تانية كتير، كنت عايز افهم شخصيتي وبحكم شغلي أفهم مشاعر واحاسيس وعلاقات ببني آدمين، وصلت لحاجة بس مش إجابة كاملة".

وتابع في ضمن المشهد: "بنتغير واحنا مش واخدين بالنا لما بندخل أي علاقة بنتغير بس مش واعيين بده، النضج في العلاقة اني اقبل فكرة أن زي ما أنا اتغيرت اللي قدامي اتغير، من غير ما أحس إن اللي قدامي خذلني، إحنا بنعز الشماعات زي عينينا لو مفيش شماعات هنعترف ونواجه".

واختتم "الشجاعة انه يواجه نفسه مش الطرف التاني، لو واجهت نفسي هقبل تغير اللي قدامي".

"الهرشة السابعة" تأليف ورشة سرد للكاتبة مريم نعوم، إخراج كريم الشناوي، بطولة أمينة خليل، محمد شاهين، علي قاسم، أسماء جلال.

View this post on Instagram

A post shared by Tamer Habib (@tamerhabibofficial)