خالد يوسف: "أنا محدش يحطلي حدود.. ورفض التلامس فهم قاصر للفن"

كتبت- نوران أسامة:

أكد المخرج خالد يوسف أنه يرفض أن يضع فنان شروط لأداء العمل، ورفض التلامس في الأعمال الفنية هو فهم قاصر للفن.

وقال "يوسف" خلال حواره مع الإعلامية أسما إبراهيم، ببرنامج "حبر سري"، المُذاع عبر شاشة "القاهرة والناس"، بعدما وجهت أسما إبراهيم سؤالا له: "لو جالك فنان قالك أنا عايز أشتغل معاك بس قالك أنا ضد التلامس بالرغم أنو ذكي هتوافق عليه".

ليرد عليها قائلًا: "أي حد هيحط لي شروط، من حيث المبدأ هرفضها، هرفض فكرة الشروط، لكن لو جالي وقالي أنا نفسياً مبقدرش أعمل مشاهد زي كده، هقوله خلاص للأسف مش هتقدر تعمل الفيلم، لأن أنا عندي مشهد شايف إن فيه فكرة، ولكن لو هو بيرفض ده وأنا معنديش المشهد ده مش هعتبره شرط".

وتابع: "أنا بشوف أن ده رأيي الشخصي ومش بفرضه على حد، هو ليه رأي تاني أنا بحترمه، ولو معنديش المشهد اللي فيه حضن أو لمسة، وهو قالي أنا مش بعمل ده هقولوا أنت بتقولي ليه أنا معنديش المشهد دا".

وأضاف: "وأنا طول عمري ضد مفهوم السينما النظيفة وضدها وخدت حرب عشانها في بداياتي، كانت الدنيا مقلوبة بسبب السينما النظيفة بشكل فظيع جدًا وأي حد بيعمل لمسة الدنيا بتقوم عليه، الفن في النهاية حالة بتعبر عن الحياة بكل مفرداتها، إنت عشان توصل التفاصيل الصغيرة بتخلي المشاهد ينسى إنه بيتفرج على فيلم".

جدير بالذكر أن خالد يوسف شارك في رمضان 2023 بمسلسل سره الباتع، عن نص أدبي للكاتب الكبير يوسف إدريس، بطولة: أحمد فهمي، أحمد السعدني، حسين فهمي، نجلاء بدر، منة فضالي، ريم مصطفى، محمود قابيل، أحمد عبدالعزيز، هالة صدقي، منة فضالي.