عصام شكري: جيلنا اسمه جيل الدراما الذهبي ومش عارف إيه سبب غيابي عن الساحة الفنية

كتبت- منال الجيوشي
تحدث الفنان عصام شكري، عن فترة غيابه عن الساحة الفنية والتي وصلت لـ 14 عام، مؤكدًا أنه لا يعلم سبب غيابه، كما كشف عن مصدر رزقه خلال هذه الفترة.
وقال عصام شكري، في لقائه مع الإعلامية إنجي هشام، في برنامج "المنسي"، المذاع عبر شاشة قناة "هي": أنا اكتشفت أن أنا وجيلي مسمينا جيل الدراما الذهبي، وبضحك وبقول هو إحنا كنا بنشتغل في الوقت ده في ظل كل الظروف تلف الأيام ويتقال علينا كده؟ مش عارف السبب إيه الضبط، ولكن اللي بشوفه دلوقتي مافيهوش اللي كنا بنعمله زمان، ودلوقتي بسمع إن المسلسل بيتكتب وفي نفس الوقت بيتصور، زمان كان بيتكتب المسلسل قبل ما يبدأ التصوير، وكان في حاجة اسمها بروفات ترابيزة.
وتابع: أنا اعتذرت عن حاجات كتير الفترة اللي فاتت بسبب أن كان بيبقى مكتوب بس 5 حلقات من المسلسل، وأنا متعود إني بقرأ المسلسل كله قبل ما أدخل، فأنا مش عارف هل رمضان بيجي فجأة؟ ما نكتب بدري ونبقى جاهزين.
وأضاف: طلع عليا إشاعة أني سافرت وبقيت مقيم في الإمارات وده عرفته بالصدفة بعد اختفائي بـ 3 سنين، وأنا ضد نظرية المؤامرة ومبتشغلنيش، وكل اللي حصل إن سنة 2010 خلصت شغلي وروحت اتفسحت في الإمارات مش أكتر من شهرين ورجعت.
واستكمل: أنا مش قادر أعرف السبب الحقيقي لاختفائي، ولكن ممكن بسبب أن الورق مش جاهز، وكان في أعمال بتتعرض عليا كانت دون المستوى، وأنا أصغر من أني أقول الأعمال اللي موجودة دلوقتي دون المستوى، وأنا اتعودت أني مشتغلش الحاجة إلا لما أكون حاسسها أوي، ومش مفترض أن كل الأعمال تكون كويسة أو هايلة، لكن في هدف عايزين نحققه، وكان في أعمال كتير كان نفسي أنا اللي أعملها وكان عندي غيرة الممثل مع أن الزميل عامله حلو، بتبقى غيرة فنية شوية والدور مكتوب حلو، فكان بيبقى نفسي أعمله.
وأكد عصام شكري، أنه لا يذهب إلى مهرجانات فنية دون أن تتم دعوته، قائلًا: أنا مش بتاع حفلات ومش بتاع مهرجان أنا مدُعتش ليه، كان زمان بيجي لينا دعاوي ومع الوقت مبتجيش فقولت أني مش هفرض نفسي، وأنا مكنش ينفع أعمل أي دور للتواجد لأن ده بيتسجل عليا وممكن أرجع أقول ياريتني ما عملته، واللي عايز تليفوني بيعرف يجيبه، أنا بقالي 14 سنة بعيد وافتكرتوني وجبتوني، وأنا عمري ما كلمت حد علشان أشتغل.
أما عن مصدر رزقه خلال فترة غيابه، فعلق عصام شكري: أنا عملت مشاريع كتير وفشلت وبعمل مشاريع تاني لأني عندي أولاد، وكان لازم أتصرف، وده بالإضافة إني موظف في مسرح الدولة، وغيابي عن الفن زعلني وقطعني، لأني كنت عايز أمثل من وأنا عندي 12 سنة وكنت بحلم باليوم اللي أمثل فيه، أنه يحصل فجأة مفيش تمثيل طيب إزاي حد يفهمني لو غلطت في حاجة علشان معملهاش تاني، وفي زملاء أنا حزين أنهم مش موجودين، وعارف قد إيه هما بيحبوا المهنة.