الإفتاء تنشر طريقة حساب قيمة زكاة الفطر: اعرف حسبناها إزاي

كـتب- علي شبل:

أعادت دار الإفتاء المصرية نشر طريقة حسابها الزكاة الفطر عن هذا العام والتي قدرتها الدار بـ15 جنيها، وذلك بعد جدل أثير مؤخرا على مواقع التواصل الاجتماعي، خصوصا على الصفحة الرسمية للدار على فيسبوك، حول تحديد القيمة في ظل ارتفاع الأسعار.

وفي بيان أعادت دار الإفتاء نشره، عبر صفحتها الرسمية على فيسبوك، قالت فيه نصا:

(اعرف دار الإفتاء المصرية حسبت قيمة زكاة الفطر ازاى بطريقة سهله وبسيطة وميسرة ولغة عامية أيضا سهله وبسيطة..

حسبناها على القمح اللى بيتعمل منه العيش اللى كل الناس فى مصر بتاكله..

طيب سعر أردب القمح كام ٩٠٠ جنيه.. والأردب فيه ١٥٠ كيلو

.. يبقى سعر الكيلو كام ٦ جنيه... طيب والزكاة أد إيه صاع من قمح... طيب الصاع يساوي كام كيلو طلع يساوي ٢.٠٤ كيلو.. يبقى نضرب ٢.٠٤ كيلو * ٦... يطلع الناتج ١٢.٢٤ جنيه... ودار الإفتاء قالت إنه ١٥ جنيه..

يعني كمان مزودين عن السعر بشويه بحيث اختلاف الأسعار في الأردب.. و١٥ جنيه الحد الأدنى يعني طلع أكتر من ١٥ جنيه لو معاك ودخلك يسمح لك... بس اللى مش هيقدر فأقل حاجه يطلعها عن الفرد ١٥ جنيه..

وتخرج قبل صلاة العيد.. ويجوز إخراجها من أول يوم في رمضان).

كانت الصفحة الرسمية لدار الإفتاء على فيسبوك شهدت جدلا بين المتابعين، وردودا رافضة لتحديد قيمة الزكاة بدعوى عدم مناسباتها للأسعار الحالية التي شهدت ارتفاعا، وطالب البعض بحسابها على سعر الأرز، خاصة أنه غالب قوت أهل البلد حسب وجهة نظرهم، وسعر الكيلو منه نحو 15 جنيها، بما يعني أن زكاة الفطر تقدر بنحو 37.5 جنيه، لكن رأت الإفتاء حسابها على القمح، وقدرتها بـ 15 جنيها عن الفرد، وفق بيانها السابق.