بالفيديو| رغم رحيله.. محمد محمود عبدالعزيز ينشر تهنئة "الساحر" للجمهور بمناسبة رمضان

كتبت- منى الموجي:

يحرص الفنان محمد محمود عبدالعزيز على التأكيد دائمًا أن والده مازال حيًا بداخله، رغم رحيله، ويهتم بنشر صوره وتوجيه الرسائل له، كما يطلب من الجمهور الدعاء لوالده وقراءة الفاتحة على روحه، مع كل منشور جديد يضعه عبر حساباته الشخصية على مواقع التواصل الاجتماعي.

ومع الساعات الأولى من شهر رمضان الكريم، اختار محمد أن يهدي الجمهور تهنئة خاصة من والده، وذلك من خلال نشر مقطع فيديو يضم صورة شهيرة لـ"الساحر" محمود عبدالعزيز، مستخدمًا برنامج لتحريكها ليبدو فيها والده كما لو كان يحرك شفايفه، ووضع صوته من رسالة صوتية قديمة، يقول فيها "كل سنة يارب وانتم طيبين واحنا طيبين".

وكتب محمد في تعليقه على الصورة "رمضان كريم وكل سنة وحضرتك طيب وبخير يا أبويا وأخويا وصاحبي وكل حاجة حلوة ليا، كل سنة وحضرتك في مكان أحسن بكتييييير من اللي أنا فيه، كل سنة وحضرتك سندي وأماني وضهري حتى وحضرتك مش موجود، يا رب أكون قادر أعمل اللي يريح حضرتك ويفرحك ويفيدك وأكون قادر إني أشرف حضرتك سواء في حياتي أو في شغلي أو في أي حاجة بعملها إلى أن يجمعنا الله سبحانه وتعالى على خير".

وتابع "زي رمضان إللي فات وإللي قبله ولحد آخر يوم في عمري بهدي حضرتك صيامي وصلاتي وأي حاجة حلوة بعملها، ربنا يتقبل مني و يقدرني وأبقى زي حضرتك في أي حاجة"، مضيفًا "رمضان كريم وكل سنة وحضراتكم جميعاً طيبين وبخير وربنا يطمن قلوبكم على كل حبايبكم ويتقبل دعائنا جميعاً لنفسنا ولكل من ندعوا لهم بحق شهر رمضان الفضيل.. اسألكم الفاتحة والدعاء لأبويا ولكل من رحلوا عنا".