حكاية المسحراتي وصاحبه الديك.. "مآمن وشكوكو" صديقان على الحلوة والمرة - فيديو

البحيرة - أحمد نصرة:

في أزقة قرية بني هلال بمركز دمنهور، بمحافظة البحيرة، يسير شاب من قصار القامة، حاملًا طبلة صغيرة يعتليها ديك في مشهد غريب لافت للأنظار.

يعمل محمد مآمن، 34 عامًا في مهنة المسحراتي، منذ 11 عامًا بعد أن ورثها عن والده، ويحظى بحب وقبول كبير بين أهالي قريته.

يقول مآمن: "بشتغل في مطعم طول السنة، وفي شهر رمضان باخد إجازة منه، وأجرة المسحراتي باخدها آخر الشهر، ومش بشترط حاجة اللي بيديني عيدية، وإللي بيديني رز أو غلة أو كحك العيد".

ويوضح مآمن سر اصطحابه للديك: "واحد كان عاطيني الديك ده هدية أفطر بيه، لقيته لطيف معايا، سميته شكوكو، و قلت مش هدبحه، وهيطلع معايا نصحي الناس ورزقي ورزقه على الله، اهو أنا أطبل وهو ساعات يأذن والأطفال فرحانين ومبسوطين بيه".

وعن أغرب المواقف التي تعرض لها خلال عمله في مهنة المسحراتي يقول مآمن: " زمان كانت الشوارع بتبقى ضلمة مش منورة زي دلوقتي، وفي يوم كنت بلف بسحر الناس مع أمي، مجموعة كلاب طلعت عليا وجرت ورايا ومسابتنيش غير لما ناس دخلوني بيتهم".

ويروي مآمن موقف آخر: "مرة كنت بستعد للنزول لبست جلابية الشغل ولسة باخد الطاقية عشان ألبسها، لقيت الفار واكل نص الطاقية، اضطريت ألف على جيراني لغاية مالقيت واحد عنده طاقية مناسبة استلفتها".

وينهي مآمن حديثه قائلًا: " أمنية حياتي أقابل الرئيس السيسي، ونفسي افتح مطعم يكون مشروعي الخاص".