"مخرجش من المكتب".. الزمالك يكشف حقيقة اختفاء درع الدوري

كتب- محمد أبوالمجد:

كشف الدكتور حسين السمري، المدير التنفيذي لنادي الزمالك، حقيقة اختفاء درع الدوري من النادي لأكثر من ساعة، قائلًا: "لسه متصور جنب الدرع النهارده، والدرع موجود في مكتب رئيس النادي اللي فيه كل الدروع اللي فاز بها النادي في الفترة السابقة".

وأضاف "السمري" في مداخلة هاتفية لبرنامج "يحدث في مصر" على فضائية "إم بي سي مصر" اليوم الثلاثاء: "خروج الدرع من مكتب رئيس النادي يكون بأذن مكتوب من الكابتن حسين لبيب رئيس النادي أو مني أو من ينوب عنه"، مؤكدًا: "مفيش حاجة حصلت من اللي اتنشرت حول اختفاء الدرع وهو موجود مع كافة الدروع، والدرع مخرجش من المكتب".

وتابع: "الدرع كان بيخرج يتصور مع اللاعبين بتأمين من أمن النادي وبيرجع لمكتب الرئيس تاني، وبالتالي فخروج الدرع من النادي مستحيل لأنه سيتحمل مسؤوليته رجال الأمن أو أمن النادي، أي ممتلكات من النادي محظور خروجها إلا بأذن كتابي وسبب خروجها".

وأردف، المدير التنفيذي لنادي الزمالك: "عندنا فكر بطرح درع الدوري للتصوير مع الأعضاء بس بنحاول نستثمر هذا الأمر بوضع الدرع في غرفة زي الاستديو واللي عايز يتصور يدخل وممكن يبقى بفلوس، مش هتكون فلوس كتير بس بنقول نستثمر الدرع، ودي فكرة طرحها الدكتور حسام المندوه، وبنفكر يكون في بعض المقتنيات الخاصة بالدرع زي تيشرت النادي وغير ذلك".