صور.. وكيل أعمال صالح جمعة يوضح حقيقة سهرة في كباريه بشارع الهرم

كتب ـ مصطفى الجريتلي:

استنكر عبد الرحمن مجدي، وكيل أعمال لاعب كرة القدم بالنادي الأهلي، صالح جمعة، مايتردد عن سهره بأحد الكباريهات في شارع الهرم.

وتداول عدد من رواد مواقع التواصل الاجتماعي، صورًا للاعب يتواجد في أحد الأماكن المغلقة، مشيرين إلى إنه داخل أحد الكابريهات.

ومن جانبه، علق "مجدي" ـ على الواقعة من خلال منشور له على حسابه الخاص بموقع التواصل الاجتماعي، فيسبوك، ظهر اليوم الجمعة، قائلاً: "هاتكلم لأول مرة باستفاضة في قصة صالح جمعة و التزامه و عدم التزامه لأن بقى زايد عن الحد و مقزز بمنتهى الصراحة و اللي يقرأ، يقرأ للآخر.. خلوني أكون واضح جداً، أنا فعلاً وكيل صالح جمعة لكن عمري ما أدافع عن الغلط، حصل قبل كده أخطاء من صالح ؟ حصل.. الأهلي عاقبه قبل كده؟ حصل.. والإعلام كله عارف كده مفيش سر، لكن هل ده معناه أن كل واحد قاعد فاضي مش وراه حاجة يحط اسم صالح في جملة مفيدة أنه بيعمل مصيبة؟ هل عشان خطأه مرة اتعرف أصبح محكوم عليه أنه مخطئ مدى الحياة؟ طب هل تعلم أن مرة أنا و صالح اتفرجنا على مباراة في دوري الأبطال في كافية، و أنا معاه نزل خبر "صالح جمعة يشاهد المباراة بصحبة فتاة أجنبية في أحد الفنادق" .. و طبعًا ناس كتير حابة تصدق من معلومات سابقة عن صالح".

وتابع وكيل أعمال اللاعب: "الصورتين اللي نازلين دول في مكان معروف جداً في مصر الجديدة، مش كباريه في شارع الهرم زي ما شوية الهمج كاتبين، والصورة باين فيها اسم المكان أكيد فيه منكم يعرفوا.. الشيء التاني أنك لو بصيت على الشباك اللي في الصورة اللي على اليمين هاتشوف الدنيا ليل ولا نهار.. طيب الناس اللي قرت الخبر و قررت تخش تشتم و تسب و تحكم أنه مش ملتزم و مفيش منه رجا، أنا مش هاقول إن صالح ملاك، لكن ليه مافكرتش تبص في الصورة تشوف فيها أيه فاضح ؟ الصورة فيها ٤ ولاد و بنتين، عرفت منين مين صديقة مين و مين خطيبة مين ؟ عرفت منين الساعة كام عشان تحكم أنها "سهرة صباحي" خاصة أن الدنيا أصلاً نهار و ده مطعم و بيقفل، عرفت منين أنها في كباريه في شارع الهرم ؟ بجد هل ده إعلام طبيعي ؟ و هل ده شكل كباريه؟".

واختتم حديثه قائلاً: "تاني أنا مش بادافع عن الغلط، صالح أو أي بني آدم غيره يغلط لازم يتعاقب، و اللي يشوفه غلطان يصوره معنديش أي مشاكل، لكن اللي بيحصل ده اسمه إعلام همجي.. أنا أفهم أن الهمجية دي بنشوفها من صفحات على الفيسبوك ولا مشجعين، لكن مواقع و مواقع محسوبة إنها كبيرة ؟؟".

وسبق للأهلي وأن عاقب لاعبه ماليًا بسبب سهره.