"تحليل الأداء سبوبة داخل النادي".. محلل شركة الأهلي السابق يفتح النار على مسئولي الأحمر

فتح أحمد سيد محلل الأداء الفني السابق بشركة الأهلي لكرة القدم النار على مسئولي النادي الأحمر واصفًا استحداث إدارة تحليل الأداء بـ "سبوبة" إضافية داخل النادي لأحد رموزه.

وقال سيد عبر حسابه الشخصي على موقع التواصل الإجتماعي "فيس بوك" حول هذه القضية :" قيمة وقامة كبيرة رشحتني للعمل في وظيفة كشاف لاعبين في الأهلي ".

وأضاف " اسم الأهلي على رأسي و أنا مُشجع و هشجع لغاية ما أموت و هنهتف بإسمه ببلاش، لكن لما يجي دورك تشتغل فأنت محتاج اللي يقدرك علشان تقدر تصرف على بيتك و احتياجاتك لأن اسم الأهلي المفترض يعني يخليك تعيش كويس مش يسيبك 3 شهور تشتغل ببلاش و بعدها علشان تكمل معاه يقولك ملاليم و فيه لاعيبه بتاخد ملايين".

وأضاف "أحد أفراد ادارة الأهلي العظيمة بعد ما عملت إنترفيو قالي هتابعوا بطولة أفريقيا للشباب في مصر، البطولة كانت شغالة و ديه بداية الأخطاء من الادارة ، كان المفترض تجهيز كل شئ قبل بداية البطولة ".

واحتضنت مصر بطولة كأس الأمم الأفريقية للشباب مواليد 2003 خلال الفترة من 19 فبراير حتى 11 مارس الماضي إبان وجود شركة الكرة السابقة برئاسة ياسين منصور".

وأكمل سيد " أبلغونا إن إدارة تحليل الأداء هي جديدة رغم أن هذه الإدارة كانت موجودة وتعمل بشكل طبيعي في 2018".

واستطرد "عملت بكل جهد وتركت عملي ، عدد ساعات عملي في إدارة تحليل الأداء تخطت الـ 16 ساعة ، والمفاجأة يمر أسبوع والأخر ولم يتم استدعائنا لعرض عملنا وما قمنا به ، ولم يعلن انضمامنا من الأساس بشكل رسمي لوسائل الإعلام".

وكشف " لم أشعر بالراحة لافتقاد الأسس العلمية والأهداف في العمل وحتى العائد المادي".

وأوضح " فيه كذب و لف و دوران و كأن فكرة تطبيق ال Scouting مُسمي فقط و أساسها سبوبة اضافية داخل النادي لأحد رموزه , لذلك رفضت استمراري".

وأنهى " مش هرضي إطلاقًا أكون عنصر في كيان يفكر مجرد التفكير في التعاقد مع لاعيبه فوق 34 سنة ، هما جايين يموتوا عندنا ده جماهير الأهلي مش بترضي بخسارة فريقها النهائي الأفريقي الثالث بعد التتويج مرتين توالياً فانت محتاج تشتغل بكل قوة علشان تحصل علي أكبر قدر من النجاح ، الأهلي لا هو قاعة تكريم و لا دار للعجزة ده ، إحنا في 2023 و لسه مش قادرين نعمل ميركاتو بقدر مكانة الأهلي او حتي الفلوس اللي بيدفعها".