"حياتنا اتلخبطت".. هكذا آثر الانقطاع المتكرر للكهرباء على أهالي البحيرة

البحيرة - أحمد نصرة:

فرض الانقطاع اليومي للكهرباء على المواطنين في محافظة البحيرة، إعادة تنظيم حياتهم ليتمكنوا من التكيف على هذه الحالة التي فرضت على المجتمع المصري منذ شهور، وزادت وتيرتها مع دخول فصل الصيف ومضاعفة أوقات الانقطاع من ساعة يوميًا إلى ساعتين وأحيانًا ثلاثة في الأيام شديدة الحرارة.

ويعد قاطني الأدوار العليا بالأبراج السكنية من أكثر الفئات المتضررة بعدما أصبح من المتعذر عليهم الخروج من منازلهم أو العودة إليها وقت انقطاع الكهرباء، خصوصًا المرضى منهم وكبار السن بسبب تعطل المصاعد.

وعن هذه المعاناة يقول محمود علي، ٦٧ عامًا: " أنا ساكن في الدور ال12 ومريض كلى باخد جلسات غسيل 3 مرات أسبوعيا، برجع من الجلسة تعبان ومش قادر، وبدل ما أطلع البيت أريح بفضل في الشارع لأكتر من ساعة مستني الكهرباء ترجع والأسانسير بشتغل لأن عمري ما أقدر أطلع على رجلي، فكرت كتير أبيع الشقة أو أجر شقة في دور منخفض لغاية مشكلة الكهرباء ما تتحل لأن باينلها مطولة معانا".

في السياق ذاته تقوم أم رشا: "حياتنا اتلخبطت، بشتغل في شفيت مسائي عشان أساعد جوزي على مصاريف الحياة، بقيت أنزل قبل معادي بساعتين عشان لو الكهرباء قطعت مش هعرف أنزل من الدور العاشر وأنا مريضة روماتويد، الوقت ده كله كان بيتي وأسرتي أولى بيه طبعا، ومش عارفة أعمل إيه، لدرجة إني فكرت اسيب الشغل، بس البيت هيتأثر ماديا والحياة صعبة".

وعانى طلاب الثانوية العامة من زيادة عدد ساعات تخفيف الأحمال وانقطاع الكهرباء ليلًا في بعض الأيام، وعن هذه المشكلة، يقول محمود: " إحنا في وسط الامتحانات دلوقتي ومعندناش رفاهية نوقف مذاكرة لو الكهرباء قطعت، اضطريت أذاكر على نور كشاف موبايل، والجو حر، والمروحة واقفة.. ظروف متساعدش خالص على التركيز".

وأعلنت بعض المؤسسات المجتمعية استضافة طلاب الثانوية العامة طوال ساعات انقطاع للكهرباء، ويقول عبدالله هيكل مسؤول إحدى المؤسسات الخيرية: "جهزنا أماكن متاحة أمام طلاب الثانوية العامة لاستقبالهم طوال ساعات انقطاع للكهرباء، هيأنا بها كل الظروف الملائمة للمذاكرة من مكاتب وأدوات وأوراق ووسائل لتبريد الهواء".

وتعرضت العديد من أصحاب المهن لمشكلات في العمل نتيجة انقطاع الكهرباء، حيث يقول محمد بدر - حداد: " شغلنا كله بيعتمد على العدد الكهربائية ولما الكهرباء بتقف الدنيا كلها بتقف، ساعتين في اليوم وأحيانا 3 كتير خالص علينا، خصوصًا إن الورش بتقفل بدري عشان الإزعاج.

ويقول أيمن محروس - صاحب محل مرطبات ومثلجات: " وقت انقطاع الكهرباء بنوقف بيع وشراء الأيس كريم لو فتحت تلاجة العرض عشان أبيع هيسيح كله يخليها مقفولة عشان تحتفظ بتبريدها، كمان خلاطات العصير وماكينة عصير القصب مش بتشتغل".