"لاقيت نفسي في بيت العروسة".. شباب يروون تجربتهم مع ضغط الأهل للزواج

- أحمد العربي، مهندس، 30 عاما

حسم المهندس أحمد العربي، مسألة الزواج مع عائلته، بجملة واحدة "أنا مش عاوز أتكلم في الموضوع ده تاني".

اعتاد "العربي" على حرية الرأي داخل المنزل مع عائلته، وكذلك في اتخاذ القرار، إلا أن والدته تضغط عليه بشكل آخر: "بيقولوا أنهم مش هيتكلموا في الموضوع ده علشان يحترموا رغبتي، لكن فعليًا، أنا كل ما أطلب من ماما تعملي حاجة في البيت، فتقولي اتجوز ومراتك تعمل لك اللي تحبه".

وتنهي والدة أحمد الحديث بطريقة بسيطة: "أنتوا أحرار أنكم متتجوزوش، لكن كل واحد يشيل نفسه، أنا تعبت".

لـ"العربي"، فكرة مختلفة عن مسألة ضغط الأهل على الابن، إذ يعتقد أن هذا الضغط لا يسبب لهم أزمة كبيرة، لأن الشباب لا ترفض الزواج بعينه، لكن هناك أسباب تعطلهم.

"كل الشباب عاوزة تتجوز، لكن كل واحد عنده سبب في تأخيره عن الخطوة دي، إما بيدور على مواصفات معينة أو فلوس وهكذا، لكن مفيش حد رافض يتجوز لمجرد الرفض"، وينظر أحمد العربي لمسألة ضغط الأهل وتأثيرها على الشباب، أنها "تهريج".